2011年1月11日 星期二

和歌山 2010 Day 03



起身嘞。望出窗又見大海嘞,可惜又係天陰陰咁…..


早餐食自助餐都唔差架。至愛豆腐同埋溫泉蛋。魚仔都好好味,之係添食,仲送咗大碗飯。


餐廳都裝璜亦不錯。


番房再執執嘢先落樓浸溫泉。日光底下嘅海中展望塔又好似好得咁喎,晏少少落去參觀先。


挨住梅桶,望住嗰海,浸一浸,真係舒筋活絡。


我望人,人望我,但係我無著衫,蝕哂…..


Check-out咗,出發去「千疊敷」嘞。出太陽嘞,好嘢。


幾分鐘車程到就到咗千疊敷站。行咗一段就見到介紹嘞。

遊客時間,影下到此一遊相先。


一層一層嘅岩石,一望無際嘅汪洋,暖和嘅天氣,爽呀。


唔明啲人點樣可以刻到啲字落石上面,更估唔到嘅係原來日本人都會咁樣破壞自然景觀。唉…..


同事問我做乜chok樣。俾人踩住個頭喎…..chok吓都要啩。


岩石嘅面積都幾廣架。嘞,爬到咁出,小心俾浪捲走呀大嬸….


大浪嘅時候實好好氣勢嘞。


呢度係和歌山縣嘅夕陽百景喎。一百個咁多,幾時先睇得哂呀?


不過未日落都好靚嘞。


又撞唔啱回程巴士嘞。近近地,行番酒店啦。路過白浜温泉公園,網友話呢度嘅「天山閣海ゆぅ庭」都好值得住架喎。


天氣唔錯,行吓傾吓又番到酒店嘞。呢度就係我哋浸嘅梅樽溫泉嘅全貌嘞。


旁邊就係「海中展望塔」。實情佢嘅售票處係連接Seamore嘅B1架,酒店仲送咗張半價券俾住客參觀展望塔。


酒店就係咁倚海而建,浴場同風呂都响哂呢邊。


人影都唔多隻喎。


行完條長命螺旋樓梯,落到去就係一個個圓形窗口。都不時有好大羣魚游過,可惜玻璃嘅清晰度一般兼魚身顏色並唔鮮艷。有啲中詐feel添….


就係靠呢袋一日兩次嘅魚餌吸引啲魚埋嚟嘞。


間唔中見到一個個氣泡浮上嚟,證明溫泉水真係响海底湧出嚟喎…..


都有好幾種魚睇到架。間唔中仲見到一兩條鮮色嘅珊瑚魚,不過感覺上半價之後到好難回本喎…..

都係時候撇嘞。但係又錯過咗班巴士,搭咗下一班番到白浜站又未夠鐘搭火車。都係怪自己無認真記住啲巴士時刻。惟有坐低响車站對面嘅café食個快飯啦。


原本都有諗過去Tore Tore市場。但係天氣凍,唔係好想食咁多魚生。一人拖住一個大喼亦係問題。加上諗住番去和歌山有黑潮市場,大阪又有黑門市場,所以一路都無跑景點,反而保持輕鬆嘅心情,响度簡簡單單食個無餸嘅咖哩飯都好愜意。


遲咗一班火車,搭咗呢班Ocean Arrow。話咁快到咗和歌山市嘞。


住嘅「ホテルグランヴィア和歌山」就係車站上面,從未如此方便過。


房間都好舒適喎。


抖咗一陣,上網揾埋邊度有K唱,又落樓行吓嘞。朋友嗌餓,去咗Mister Donut食件冬甩。


一鹹一甜,好餓咁喎。嗌個餐,包杯嘢飲,天寒地凍都幾好喎。


冬甩非我所好,過咗隔籬Beard Papa買咗布甸食。好味到呢…..朋友見到都流口水,買咗樽嗰晚做宵夜。


有啲嘢落肚,個人定哂,安心去搵K唱嘞。搵路途中,竟然發現大街大巷仲有鹹片戲院!?


搵到間兜踎K,貪佢有Joysound,但係哥仔竟然話有Joysound嘅房咁啱full哂。吓?但係都照唱啦。


都唔算貴喎。


實在明明無乜人架喎,難到只有一間房有Joysound??


唱完又都黑齊。出力唱咗三個鐘,肚仔餓嘞。仲諗住上近鉃百貨上面嘅餐廳食餐好啲,但係上面嘅餐廳比較流….


行多幾步,見到有間响地庫嘅餐廳好似唔差咁,仲有啲唔太貴嘅懷石料理,就衝落去嘞。餐廳叫做「味どころ 銀杏」。

都係八點半左右,但係姐姐好似好驚訝竟然仲有客嚟咁。不過驚愕表情一閃即逝,轉過頭仲好好咁安排我哋坐個室添。嗌咗杯桃味嘅啤酒,好盞架。

本應又諗住食個好少少嘅set,但係姐姐問咗師博之後話唔做嘞,平啲嘅招牌「銀杏」set就做到。噢,有錢都唔賺?可能有啲餸準備唔切啦。

實在有魚有肉,都唔係正宗嘅懷石,不過同朋友一致認為呢餐仲好味過禽晚溫泉酒店嗰餐。

美中不足係條鰈魚嘅骨腩炸得唔夠脆,好睇唔好食,成口渣。

好想食蠔,散叫咗個蠔嘅土手燒。濃濃嘅汁配埋鮮甜嫰滑嘅蠔,超好食呀…..

甜品係蘋果sorbet,粒粒果肉,真係要好似啲旅遊節目咁講聲「好幸福呀~~」

返到酒店,執吓啲手信先。聽日番大阪,觀賞自然景觀嘅行程完成嘞,都會血拼即將開始!
上一站北陸中部 -- Click
和歌山Day 02 -- Click
和歌山Day 04 -- Click

沒有留言:

張貼留言