2011年1月16日 星期日

和歌山 2010 Day 04



起身望出窗,乜又係陰雲密佈咁呢?


酒店包早餐,瞓到最晏先碌落去食。噢,原來酒店嘅lift可以通到落近鉃百貨嘅餐廳街,早餐都係响入面其中一間餐廳食咋。


臨近早餐時段嘅尾聲,又係包場咁滯。


搵個窗邊位,對正車站。又提提你,聖誕就到嘞。


係好多選擇嘅自助餐。响百貨公司入面,都會有街外人幫襯,質素認真唔錯呀。


呢啲好似蘿蔔嘅嘢,日文叫「蕪」或「蕪菁」,查咗wikipedia,原來即係大頭菜呀!好好味架。


年尾合時嘅柑,好甜噃。


食飽飽,搭車番大阪嘞。血拼尚未開始,呢一刻仲係一人一個喼啫。

仲以為搭嘅呢班都只係普通嘅くろしお号……


上咗車先發覺佢係Panda列車,勁搞笑。


其他乘客可能習以為常,我就大鄉里咁起勢係咁影。


九個字唔駛就到咗天王寺嘞。


再轉車去咗JR難波站。得到車站清潔叔叔嘅指引,話咁快就到咗呢個門面超搞笑嘅道頓堀酒店「なんば道頓堀ホテル」嘞。


唔駛等到兩三點就可以check-in,非常抵讚。入房第一件事係開咗日本朋友嘅寄件。登登,「竹內まりや」嘅演唱會飛呀。


房間係典型嘅商務酒店格局,但係設計心思都好周到架。床下底大大條罅,可以平放兩個開咗嘅大喼。


仲有萬有手機差頭、啱香港人用嘅旅行插頭、窩心嘅千羽鶴、除臭噴霧、lan線、中文嘅周邊景點同店舖介紹…..麻雀雖少,五臟俱全啊!


安頓好之後,出去搵食嘞。Namba Hips,超型。望住Hips嘅水牌,正愁緊食乜….


朋友瞄到對面馬路有高島屋,建議揀一間上面嘅餐廳食晏。


揀咗九樓呢間食現代法國料理嘅「lumière l'esprit k」。


簡約嘅型格設計。


靚靚擺設,一有嘢食就被人攞走嘞。


我嘅捷克啤。


朋友嘅Beer Zero。無錯,係零卡路里零酒精嘅日本Suntory啤酒。


佐酒小食芝士球。


法包配蕃茄醬。


前菜嘅南瓜terrine拌帶子沙律,仲有用唔同天然材料做,七彩嘅醬汁。


First dish唔知咩魚嘅cabbage roll拌泡泡,超超超正…..


Second dish之前仲要揀刀,好隆重咁喎。


Second dish我揀咗牛,好味。


朋友嘅鴨胸超滑,仲配咗件好盞嘅鵝肝漢堡。


天呀…..甜品點解又係食焗蘋果,重要係濃濃嘅肉桂味…..


朋友話杯咖啡好得。我就唔係好識欣賞嘞,不過拌咖啡嘅甜點就真係一流嘞。


食飽飽行下。行咗一陣高島屋再去咗Namba Parks。有我想買嘅Admiral同Collective,但係無得退稅喎。唔買住,留番番去東京先。

挨晚嘞,係時候出發去「大阪城Hall」嘞。


比起地鉃,JR真係少人啲。


到咗大阪城公園駅。噢,落雨添。


出車站行無耐就到大阪城Hall。都要啲時間入場喎。六點開show,放工即嚟都真係勁趕。


有啲時間,買咗對主題file留念。


登登,呢次嘅concert叫Souvenir Again,竹內まりや已經十年無開過演唱會。朋友揾咗幾個日本朋友大包圍先抽到飛咋,好難得。


散場嘞。係開場半個鐘嘅guest有啲悶,成場演唱會氣氛好好。至愛呢首「人生の扉」(youtube只揾到呢個稲垣潤一同白鳥英美子嘅合唱版本)。
...
I say it’s sad to get weak
You say it’s hard to get older
And they say that life has no meaning
But I still believe it’s worth living
...

場館通比較窄,散場搞咗好耐。
都成十點,响場館門口食咗兜唔好食嘅墨魚小丸子,頂頂肚。諗住番道頓堀食間意大利風嘅関東煮。撞鬼,無開!


咁就揾間拉麵食吓啦。入咗「ラーメン四天王」,茅人嘅?


坐低揀咗食乜先醒起要自己買飛,侍應大叔見無乜人,幫我地搞。點啲一搞就嚟陸續嚟咗廿人都有,大叔當堂亂哂。嘩,老外都嚟呀。


嗌咗拉麵多葱。人人見到啲葱堆到座山咁都眼望望。我食拉麵就緊要啲隻蛋,半生熟糖心,好好食呀。


餃子都唔錯架。

噢,勁大福山雅治廣告牌,超型!


道頓堀係不夜天,成十二點都勁多人。番酒店瞓覺好,明天又玩過。
上一站北陸中部 -- Click
和歌山Day 03 -- Click
和歌山Day 05 -- Click

沒有留言:

張貼留言